Градоначалникот на Куманово Максим Димитриевски денеска организираше прием за најдобрите ученици спортисти, наставници по физичка култура и тренери од кумановските основни и средни училишта во Куманово, информираа од локалната самоуправа. Приемот е организиран за учениците спортисти кои освоија бројни награди на државни првенства во индивидуални и колективни спортови.
Како што наведуваат од општината, градоначалникот им честитал на младите спортисти за постигнатите резултати, истакнувајќи го непобедливиот и нескршлив спортски дух по кој Куманово е препознатливо низ историјата. Учениците се натпреваруваа во повеќе спортски дисциплини, во машка и женска конкуренција, меѓу кои кошарка, ракомет, одбојка, футсал и атлетика, со поддршка на Општинскиот сојуз на училишен спорт Куманово – ОСУСК.
Награди и трофеи од државните натпреварувања освоија ученици од ООУ „Кочо Рацин“, ООУ „Браќа Миладиновци“, ООУ „Браќа Рибар“ од село Табановце, ООУ „Толи Зордумис“, ООУ „Христијан Карпош“, ООУ „Крсте Мисирков“, ООУ „Бајрам Шабани“, ООУ „11 Октомври“, како и од средните училишта СОУ Гимназија „Гоце Делчев“, СОУ „Перо Наков“ и СОУ „Наце Буѓони“.
