Градоначалничката на Кисела Вода Бети Стаменкоска Трајкоска во рамките на тековниот циклус теренски посети низ месните и урбаните заедници во Општината, придружувана од раководителите на секторите од општинската администрација, вчера вечерта оствари работна средба со жителите на месната заедница Усје.
Во соопштението на Општината се наведува дека овој отворен собир претставувал одлична можност за непосреден разговор за досегашните резултати, како и за плановите за идните инвестиции во оваа населба.
Во делот на реализираните проекти, присутните упатиле благодарност до Општината за финансиската поддршка и покривањето на котизацијата за фудбалскиот клуб Усје, со што му се овозможи непречено учество во натпреварите. Жителите ја поздравиле и редовното одржување на хигиената во однос на чистење, косење и кастрење гранки, а го нагласиле и значењето од започнување на процесот за уредување на Усјанскиот канал.
Покрај освртот на сработеното, на средбата детално се разговарало и за идните приоритети и барања на локалното население. Во насока на подобрување на инфраструктурата, граѓаните побарале асфалтирање на два крака од улица „1“ во МЗ Усје, изработка на проект за затвoрање на Усјанскиот канал, како и поставување сообраќаен знак за ограничување на носивоста за камионите и миксерите кои се движат низ населбата.
Дополнително била истакната потребата од проширување на мостот на улица „4“, реконструкција на улицата во месноста позната како „Дупки“, како и проширување на паркинг-просторот пред црквата „Св. Атанасиј“.
-Сите изнесени предлози, забелешки и барања беа детално нотирани од страна на стручните општински служби со цел нивно натамошно решавање. Теренските средби продолжуваат и во наредниот период, при што со овој циклус посети ќе бидат опфатени сите месни и урбани заедници во Општина Кисела Вода – се вели во соопштението.
