Во Гази Баба ќе испишеме историја во вториот круг, порача кандидатот за градоначалник на Град Скопје од ВМРО-ДПМНЕ и Коалицијата, Орце Ѓорѓиевски, кој вечерва оствари средби со граѓани во Идризово и Стајковци.
-Ви благодарам за убедливата поддршка и најголемата разлика во гласови токму овде. Тоа покрај чест, е и огромна одговорност што ја прифаќам со целото срце. Му честитам и на мојот пријател Бобан Стефковски за победата во првиот круг, објави на својот Фејсбук профил Ѓорѓиевски.
Ѓорѓиевски, во новиот мандат најавува подобрување на водоснабдувањето преку приклучок на главната цевка.
-На булевар „Хрватска“ покрај тоа што ќе се изградат две нови ленти и две пешачки зони, во рамки на истиот зафат ќе се постави нова водоводна мрежа. Со тоа конечно, после три децении, Црешево и Смилковци ќе имаат нормално водоснабдување, објави Ѓорѓиевски.
Ѓорѓиевски, исто така, најавува и итно решавање на проблемите со ЈСП и Комунална хигиена.
-Свесен сум за сите проблеми во јавните претпријатија, но денес сум повеќе од кога било мотивиран да ги решиме, со силна поддршка од Премиерот Христијан Мицкоски и со јасна волја за работа. 60 автобуси се подготвени и само чекаат зелено светло, а со уште 40 што ќе ги сервисираме, Скопје ќе добие 100 функционални автобуси уште веднаш, најавува Ѓорѓиевски.
Во новиот буџет, Ѓорѓиевски, исто така, најавува милион евра за нова фекална канализација во Идризово.
-Не доаѓам, почитувани, со празни зборови. Доаѓам со кредибилитет, со работа зад себе и со јасна визија напред. Заедно со Боби, ги засукуваме ракавите и уште веднаш почнуваме со работа. Време е за конкретни дела и нова страница на развој во Гази Баба и Скопје. Да излеземе масовно и референдумски и да го избереме најдоброто што доаѓа, објави Ѓорѓиевски.
