Бојко Борисов е победник на изборите во Бугарија, но останува енигма дали ќе успее да состави влада по одржувањето на седмите парлементарни избори во последниве четири години на кои излезноста е 38%.
Герберите освоија речиси 27 отсто од гласовите или 74 од вкупно 240 пратеници, па за Борисов да формира влада ќе мора да коалицира.
Во Парламентот влегуваат дури девет политички сили според резултатите на Централната изборна комисија. Бугарските аналитичари прогнозираат дека Борисов сепак ќе се обиде да формира Влада и ќе успее доколку најде заеднички јазик со идните коалициски партнери.
Поранешниот амбасадор на Македонија во Бугарија, Марјан Ѓорчев, вели дека неизвесноста дали Бојко Борисов ќе формира стабилна Влада е голема. Сепак, не ја отфрла можноста и за широка коалиција.
За Македонија најдобра опција би било во Бугарија да се формира стабилна политичка Влада, што со оглед на резултатите, би било тешко изводливо. Амбасадорот Ѓорчев вели дека позитивен сигнал е тоа што ГЕРБ освои најмногу гласови бидејќи е сестринска партија на ВМРО-ДПМНЕ.
Според преброените гласови на Централната изборна комисија во Софија, победници се ГЕРБ-СДС која зема над 74 мандати. На голема дистанца по Герберите е партијата на Кирил Петков со 42. Трета по ред е Преродба со 36.
Гледајќи го расчленувањето на гласовите ќе бидат потребни три или четири партии за да се формира мнозинство.
Досега, Борисов само ја отфрли можноста да работи со крајнодесничарската, „Преродба“.
