Полни со дрога полициски камиони, во придружба на голем број комбиња и возила на МВР. Запленети 27 тони марихуана, тоа се неофицијалните информации до кои дојде Алфа. Во кругот на фабриката Охис, каде се наоѓа компанијата Алфафарм ДОО Скопје, повеќе од пет часа се товареше одзмената опојна дрога. Кордонот на МВР, во придружба и на царински инспектори, во дворот влезе некаде пред 17:30, а со силно полициско обезбедување замина на еден час пред полноќ.
Надлежните се уште официјално не излегуваат со детали. Она што е познато е дека МВР во соработка со Обвинителството за гонење организиран криминал и корупција влегоа во голема полициска акција во Скопје и Струмица, во фирми поврзани со производство на опојна дрога.
-МВР во координација со ОЈО ГОКК презема соодветни мерки и активности на локации во Скопје и Струмица во врска со опојна дрога. Повеќе детали по завршувањето на активностите, кажаа претходно од МВР.
Оваа полициска акција доаѓа по големата заплена на пет тони марихуана во Србија, за која српските власти тврдат дека влегла од Македонија. Според информациите претреси се вршеле на неколку локации, поврзани со истрагата кај северниот сосед. Неофицијално до сега пронајдени биле неправилности во работењето, марихуаната незаконси се одгледувала, складирала, чувала и транспортирала.
Инаку, Компанијата Алфафарм ДОО Скопје која е предмет на истрага на обвинителите, е регистрирана во Македонија во 2023-та година, со основачки капитал од 529 илјади и 50 евра. Регистрирана е како фирма за одгледување и преработка на ароматични и лековити билки за фармацевтска употреба. Компанијата дозвола за одлегување канабис во медицински сили добила 16-ти април 2024-та година. Според податоците од Централниот регистар, косопственици таму се Иван Драганиќ, Предраг Брковиќ, Роберт Живковиќ и Јована Мијаловиќ.
Матеја Петровски
