Голем хакерски напад во Данска: украдени личните податоци на 8,8 милиони луѓе

Хакиран е централниот регистар во Данска, кој ги содржи податоците и адресите на 8,8 милиони луѓе. „Националниот орган за регистрација утврди дека неовластени лица добиле нелегален пристап до имињата, адресите и броевите на социјално осигурување на приближно 8,8 милиони регистрирани лица“, се наведува во соопштението на данското Министерство за дигитализација. Истрагата е во тек, но во оваа фаза сторителите сè уште не се откриени. Алармот бил вклучен во петокот, со информацијата дека во текот на септември била забележана аномалија во таканаречениот „ЦЕ-ЕР-ПЕ“ систем. Националниот регистар на Данска содржи податоци за 11 милиони луѓе. Покрај луѓето кои живеат и престојуваат во земјата, тој содржи информации за луѓе кои починале и луѓе кои емигрирале.