Речиси 18 милиони евра долг оставило претходното раководство на ЈП за Државни патишта. Актуелниот директор Коце Трајановски вели дека долгот бил и до 10 пати поголем од парите кои претпријатието ги имало на сметка, но за краток период успеале да ги консолидираат финансиите. Долговите не биле плаќани по поднесените фактури уште од февруари. Особено голем долг имало претпријатието кон Македонија пат. Трајановски е најмногу задоволен од големиот прогрес во наплатата на патарини.
„Значи имаме во јули, за 66 милиони поголема наплата во однос на минатата година. Тоа јасно зборува дека ние работиме посветено, работиме домаќински за да може од ЈП да биде во многу стабилна состојба. Уште нешто сакам да потенцирам. Има потпишано договори со многу високи цени. Само една цена ќе кажам за споредба. За ангажирање на еден електроинженер со ВСС, за еден час работа цената е 30 илјади денари“ – вели Коце Трајановски, директор на Јавно претпријатие за државни патишта.
Автопатските делници долж коридорите 8 и 10, како Прилеп-Битола, Тетово-Гостивар и Гостивар – Букојчани, а особено патот Кичево – Охрид се во фокусот на надлежните. Министерството за транспорт и Јп за државни патишта имаат редовни неделни состаноци за елиминирање на проблемите и забрзување на градбата.
„Состојбата ако кажам дека е лоша, е благ збор. Наследивме катастрофална состојба, кадешто проекти воопшто не се менаџирале, кадешто за обични административни работи се заглавувани проекти по година, две, три. Ќе дадам само еден пример. Експресниот пат Градско – Прилеп којшто треба да го забрза движењето на целиот централен регион на Македонија, беше заглавен година и половина заради неформирање на комисија заради незавршување на процедурални работи коишто за само месец дена ги завршивме и во вторник со информација на Влада ќе го завршиме и тоа, такашто за брзо време тој пат ќе биде ставен во функција“ – вели Александар Николоски – министер за транспорт.
Премиерот Мицкоски го повика јавното обвинителство да работи на откривање на целиот криминал во јавното претпријатие за државни патишта, направен пред промената на власта. Според него, мора да има одговорност за направените штетни договори, поради кои се одлевале пари на граѓаните.
„Го повикувам јавниот обвинител избран од мнозинството СДСМ и ДУИ да влезе во институциите и да се позанимава со криминалот којшто го правеле функционерите од СДСМ и ДУИ. Само така ќе покаже дека навистина е неутрален и објективен. Во спротивно ќе мораме ние како Влада да го заштитиме интересот на граѓаните. Ако не се постапува, ако не се работи, ние мораме, затоа сме платени од граѓаните и ние мораме да го заштитиме тој интерес“ – вели Христијан Мицкоски – претседател на Влада.
Голем напредок во последниве два месеци е направен не само преку собирањето на патарини, туку и УЈп собрало повеќе даноци, а Царинската управа царински давачки.
И покрај пониските приливи во буџетот во првите 6 месеци, особено од ДДВ и акциза, Владата со ребалансот испланира да собере за 2,6% повеќе пари во државната каса. Планот е да се подобри собирањето на овие два данока и да се зголеми наплатата кај царините, данокот на добивка, данокот на личен доход, пензиско и здравствено осигурување, административни такси, концесии и неданочни приходи.
