Македонскиот Фонд за здравство покрива 1.836.667 осигуреници, од кои дури 25% се лица без приходи. Ваквите бројки кои се таложат со години, стануваат огромен товар за државата. На корисничката листа има дури и починати луѓе, невработени, граѓани кои живеат со години во странство и се корисници на тамошно осигурување. Список се прочистува, а паралелно се олеснува пристапот до користење на бесплатно здравство за сите граѓани. Фондот воведува реформа со која само едно барање, без разлика дали коринсникот е невработен, има одредени приходи или работи со договор на дело сепак ќе има право на осигурување за лекување.
“Во основа оваа категорија, овозможува за лицата кои минатата година имале под 293.000 денари приходи, кои во последните два месеца имале помалку од 48.000 денари да добијат бесплатно здравствено осигурување, а за лицата кои имале повисоки приходи од овие плаќаат придонес на основица 50 отсто од просечна плата, а тоа е 2.593 денари месечно, да се здобијат со здравствено осигурување. Точно е дека немаме категории кои не се опфатени, но има проблеми со здравствено осигурување во поедини случаи, но ние работиме на тоа” – вели Клековски.
Работна група на Фондот, Министерството за финансии, Министерството за здравство и УЈП, работи на критериумите за лицата кои не остваруваат приходи, каде фокусот е на две групи – осигурениците што непосредно останале без работа и осигурениците кои имаат непријавени приходи односно сива економија и работа во странство.
Во меѓувреме институциите ги анализираат потребите и можностите за независно
здравствено осигурување на малолетни лица до 18 години.
Не само прочистување на списокот на корисници на здравствено осигурување, Фондот продолжува да ги чешла и јавните здравствени установи. Директорите на клиники и болници кои незаконски си ги зголемиле платите, кои беа откриени во досегашните проверки ги вратиле парите.
