Лидерот на СДСМ, Венко Филипче бара антикорупциската комисија што побрзо да го истражи случајот со неговите имотни листови што ВМРО-ДПМНЕ неколку дена го пласира во јавноста.
Според него, имотниот лист што го поднел е идентичен, односно кога ќе се видел вкупниот имот се работело за иста квадратура, а единствената разлика била во начинот на пријавување.
„Во претходниот имотен лист не се става, а сега има простор да се стават имотни листови како документи. Кога ќе се анализира сето, тоа ќе се види дека е исто“, рече Филипче и најави и дека ќе бара извинување од премиерот Мицкоски откако антикорупционерите ќе излезат со став.
Инаку, ВМРО-ДПМНЕ тврдат дека во анкетниот лист од 2024 година Филипче навел дека поседува имот кој во 2018 година не го пријавил во анкетниот лист кога станал министер. ВМРО-ДПМНЕ ги повика институциите да истражат зошто Филипче не пријавувал имот во своите анкетни листови, а него го повикаа самиот да одговори.
Тие тврдат дека Филипче како министер за здравство во својот анкетен лист пријавил куќа од 464 метри квадратни изградена во 2017 година, како и стан од 130 метри квадратни, стекнат како подарок во 2016 година. Додека, пак, на име заеднички имот пријавил уште еден стан во скопје од 50 метри квадратни, стекнат со договор за купопродажба во 2010 година.
