Од срам и злоупотреба на народните пари, до расчистување на имотноправните односи и старт со градба. Пратеникот и лидер на СДСМ Венко Филипче и премиерот Мицкоски со меѓусебни критики за „Бехтел и Енка“. Филипче ели дека владејачката партија како опозиција била против проектот кој го нарекувала историски криминал, за потоа со него да се фали како историско постигнување. Премиерот пак истакна дека договорот со конзорциумот не може да се раскине затоа што, во спротивно би се платиле стотици милиони евра казнени пенали. Вели дека го декласифицираат документот, додека владата на СДСМ и ДУИ платила 350 милиони долари, без да почне со работа.
Пратеникот Ковачки од ВМРО-ДПМНЕ зборувајќи за развојот на локалните заедници, изградбата на патишта, училишта, градинки и водоводи, праша дали има селективност при доделување на парите за инфраструктурни проекти за општините. Нотира дека бројни градоначалници од СДСМ веќе се пофалиле дека им биле одобрени финансии од централниот буџет за да градат во своите општини. Премиерот напомена дека рамномерниот регионален развој е приоритет за оваа влада, дека пари за оваа намена ќе има во сите години до крајот на мандатот.
Мицкоски истакна и дека не е само „Бехтел и Енка“. Имало многу случаи на можни злоупотреби на државни пари кои допрва ќе се расчистуваат. Рече дека поради погрешните политики на претходната Влада, сегашната е принудена да плаќа заостанати долгови на ЕСМ, неплатени фактури за патната делница Кичево-Охрид и многу други кои паѓаат на товар на буџетот, односно на граѓаните.
