Петтиот фестивал на биодиверзитет под мотото „Сочувај го вкусот, сочувај ја традицијата“ ќе се одржи денеска кај Фонтаната во Градскиот парк во Скопје, во организација на Слоу Фуд Водно.
Фестивалот, како што информира организаторот, е посветен на богатството на природата, зачувувањето на локалните сорти, традиционалното земјоделско наследство и поддршката на локалните производители. Посетителите ќе имаат можност да ги запознаат производителите, да дегустираат локални производи и да дознаат повеќе за значењето на зачувувањето на биодиверзитетот и традиционалните земјоделски практики.
Во фокусот на годинашното издание е скопскиот јабучар – стара и препознатлива локална сорта домат, карактеристична по својот автентичен вкус и значајна за традиционалната скопска градинарска култура.
Токму преку ваквите примери фестивалот ја истакнува поврзаноста меѓу природното богатство, земјоделското наследство, културата и храната што ја имаме на трпезата, посочуваат од Слоу Фуд Водно.
Фестивалот се одржува со поддршка од Град Скопје, We Effect и Слоу Фуд Македонија.
