Со размена на информации, идеи и знаења заврши тридневната Едукативна експедиција што се реализираше во рамки на проектот „Green Care кариера: Унапредување на здравјето, одржливоста и целта во земјоделството“.
Домаќин на Експедицијата беше СУГС „Браќа Миладиновци“ – Скопје, а учествуваа уште три училишта: од Каштел, Хрватска, од Ново Место, Словенија и од Пожаревац, Србија.
Во фокусот беа наставните програми за одржливо земјоделство, здрава храна и производство на ароматични растенија.
-Темите на работилниците беа „Создавање домови за корисни инсекти – мали суштества, голема улога“, „Производство на македонска урда – меѓу здрава храна и концепт на нула отпад“, Мирисот на природата: Лековитите растенија како мост меѓу здравјето и екологијата“ и „Зелена заштита: Правење природни пестициди за одржливо земјоделство“. Учествуваа ученици од прва до четврта година од четирите училишта. Акцџент беше ставен на интегрирање на одржливото земјоделчство, ментална благфосостојба на учениците и земјоделците, како и производство на здрава храна, вели професорката Кристина Јованова од СУГС „Браќа Миладиновци“ – Скопје.
Како што информира Јованова, ова е првата Едукативна експедиција во која учествуваа по четири ученици од секое училиште. Во рамки на проектот идната година ќе се одржат уште три вакви експедиции – во февруари во Пожаревац, Србија, во мај во Грм, Ново Место, Словенија и во септември во Каштел, Хрватска.
