Во овој момент, за вкупно 16 лица е определен краткотраен притвор од 48 часа во врска со трагичниот пожар во дискотеката во Кочани, при што загинаа 59 лица, а повеќе од 150 се повредени.
Основното јавно обвинителство во Кочани предложи мерка краткотраен притвор за 16 лица, што беше прифатено и реализирано, велат од Државното Јавно Обвинителство.
Меѓу приведените се и поранешниот министер за економија, Крешник Бектеши, и поранешниот директор на Државниот пазарен инспекторат, Горан Трајковски.
Мерката краткотраен притвор се применува во случаи со особено сложена истрага, кога е потребно да се приберат дополнителни докази и да се утврдат сите околности за понатамошно истражување.
Според Законот за кривичната постапка, краткотраен притвор може да се определи двапати по 48 часа, пред да се донесе формална наредба за започнување истражна постапка.
Оваа мерка му дозволува на јавниот обвинител да задржи осомничени лица подолго од 24-часовното полициско задржување, за да може да ги собере потребните информации и да ги утврди сите факти и околности. По отворањето на истрагата, обвинителот може да предложи нови мерки за обезбедување на осомничените, при што краткотрајниот притвор се укинува и се заменува со редовен притвор.
