И покрај оптимистичките најави на градоначалникот Ќура дека посебниот предлог-закон за уредување на крајбрежјето, на кој што работат двете општини Охрид и Струга, ќе биде готов до март, истиот сѐ уште не е доставен до Собранието и ресорното министерство. Изготвувањето на законско решение оди бавно и е комплексен проблем, актуелен со децении. Целта е да се најде најадекватно решение со кое ќе се стави крај на узурпацијата и приграбувањето на секоја слободна површина.
Плажите се горлив проблем, посебно за Струга, каде владее безредие. Ќура наследи хаос – фирми без концесии десет години остваруваат милионски приходи од користење на плажите, а договорите за стопанисување им се истечени во 2016-та. Безмалку на секоја слободна површина се изградени објекти од тврда градба, а никој досега не ги санкционирал.
„Овој проблем нема да се реши одма. Треба време да се сработи како што треба, да се донесе адекватен закон кој ќе важи засекогаш. Поради тоа што концесиите кои што се издадени 2011-та се дадени за 5 години за да се вратат во првобитна положба целата плажа, што не е логично. Јас се согласувам дека тие печалат на диво, тоа се согласувам“ – вели Менди Ќура, градоначалник на Струга.
За Ќура, нелогично е барањето на еколозите да се срамнат со земја сите објекти кои никнаа на плажите, оти концесионерите кои со години стопанисуваат на диво вложиле и по 300.000 евра, иако крајбрежјето не е приватен имот.
Што се однесува до Охрид, пак, градот ќе ја дочека туристичката сезона со организирано уредување на плажите, каде изминативе 4 години на лето се поставува само урбана опрема.
„Начинот на стопанисување е една работа, а законското уредување е друга работа. Тоа што тие законски договори кои што беа потпишани и членот предвидуваше враќање во првобитна положба ги наруши само принципите. Инаку, сите овие плажи кои што се изградени, се изградени и со одобрение и со дозвола и со урбанистички проект“ – вели Кирил Пецаков, градоначалник на Охрид.
Инаку, согласно Законот за градежно земјиште и другите законски прописи, плажите се во надлежност на локалните самоуправи на Охрид и Струга.