Досега 119 лица од семејствата на повредените во пожарот во Кочани биле транспортирани и сместени во странство, во градовите каде што се лекуваат нивните најблиски.
Портпаролката на Владата, Марија Митева, информираше дека овој број ќе се зголеми, бидејќи продолжуваат транспортите на повредени лица за лекување во други земји.
„До пред неколку часа имавме информација дека 119 лица се безбедно транспортирани и сместени во странство. Сè уште продолжуваме со праќање на пациенти, и очекуваме дека бројот ќе се зголеми. Сите членови на семејствата ќе бидат контактирани и ќе им биде обезбеден транспорт и сместување што е најповолно за нив, во близина на болниците каде што се сместени повредените,“ рече Митева на прес-конференцијата.
Таа нагласи дека е обезбеден контакт број за сите семејства, на кој можат да се обратат за организација на транспортот и сместувањето.
Во врска со финансиската помош, Владата ја официјализираше одлуката за обезбедување 30 милиони денари преку Министерството за финансии, кои ќе се пренесат на Службата за општи и заеднички работи (СОЗР) за помош во организацијата на транспортот и сместувањето на најблиските на повредените кои се лекуваат во странство.
Митева исто така информираше дека одлуката важи и за лицата кои веќе биле испратени пред донесувањето на одлуката и тие ќе имаат право на ретроактивна исплата на средства.
Во однос на иницијативите од граѓаните за помош во сместувањето на повредените во странство, Митева посочи дека е тоа за поздравување и дека Владата ќе продолжи да ја поддржува солидарноста и помошта.
