Време е за промени во Демир Капија, доволно беа овие осум години со водоводи кои не функционираат, улици кои се распаѓаат, затоа гласајте за бројот 9, истакна Наталија Димитриева, кандидат за градоначалник за општина Демир Капија од ВМРО-ДПМНЕ.
Таа се обрати на денешниот настан одржан во општината, под слоганот „Вистинскиот избор! Твојот човек! Твоето место! За твојата иднина!“, во рамките на изборната кампања за вториот круг од локалните избори кои ќе се одржат 2 ноември. Притоа наброи дел од проектите на изборната програма.
– Доволно беа овие осум години, водоводи кои не функционираат, улици кои се распаѓаат, млади кои заминуваат, Демир Капија повеќе не е општина со развој. Затоа, секој нереализиран проект е потрошено време, секое лажно ветување претставува разочарување на секој граѓанин. За да постигнеме развој во општината, потребно е да започнеме од најприоритетните проекти. Најпрво од село Прждево, жителите после осум години заслужуваат да добијат квалитетна вода за пиење, со што ќе изградиме објект по сите стандарди кадешто ќе имаат станица со хлор, во село Корешница ќе имаме барање до Регулаторна Комисија за намалување на цената на водата, најмалку до 10%, во село Бистренци ќе се санираат сите недостатоци кадешто имаме недостаток на вода, исто така во Село Дрена, Чифлик ќе се реализираат канализациската мрежа, посочи таа.
Димитриев се осврна и на други приоритетни проекти, асфалтирање на улици во село Чифлик, Дрен, Бистренци, и Корешница.
Таа посочи дека благодарение на финансиските средства од Владата, во Демир Капија ќе се реализирале повеќе проекти и ги повика граѓаните на 2 ноември да го направат вистинскиот избор за, како што рече, конечно да се врати достоинството во Демир Капија.
– Исто така голема благодарност до Владата на Република Македонија која во општина Демир Капија издвои средства во износ над 35 милиони во коишто ќе се реализираат повеќе проекти и тоа доизградба на кујна во основно училиште „Димче Ангелов-Габерот”, проект за улично осветлување, проект за канализациски мрежи, проект доизградба на фудбалско игралиште. Ве повикувам, на 2 ноември да излеземе што помасовно, да го дадеме својот глас за бројот 9 за да го вратиме достоинството во општина Демир Капија, повика Димитриева.
