Делегација од Уставниот суд ги посетила Европскиот суд за човекови права и Советот на Европа. За време на посетата членовите на делегацијата се запознале со работењето на овие клучни европски институции, присуствувале на рочишта и презентации и оствариле средби со судии и правни експерти.
Како што информираат од прес-службата на Уставниот суд, делегацијата присуствувала на рочиште во Големиот совет на Судот по предметот Tergek v. Türkiye (бр. 39631/20) и се запознала со работните методи и процедурите на Судот.
Во текот на посетата членовите на делегацијата учествувале во обуки за работењето на Судот, се запознале со базата на податоци HUDOC и платформата за размена на знаења, како и со процедурите за администрација и менаџмент на случаи. Исто така, се запознале со активностите на Одделот за извршување пресуди.
Делегацијата го посетила и Парламентарното собрание на Советот на Европа, каде што беа презентирани програмата HELP и работата на Канцеларијата на комесарот за човекови права.
За време на сите активности членовите активно учествувале на состаноци и презентации, ги анализирале процедурите и механизмите за заштита на човековите права и добиле практични насоки за унапредување на работата на Уставниот суд.
Посетата била оценета како исклучително продуктивна, со значајна размена на знаења и искуства и со јасна перспектива за унапредување на соработката помеѓу Уставниот суд, Европскиот суд за човекови права и Советот на Европа. Оваа посета ја организира делегацијата на Европската Унија преку проектот за владеење на правото и јакнење на капацитетите, финансиран од ИПА 3-програмата.
Делегацијата на Судот била предводена од генералната секретарка Виолета Ѓорѓиевска, шефицата на кабинетот на претседателката, Љубица Гаџовска, советниците Татјана Јањиќ-Тодорова, Александар Лазов, Јасмина Симоновска, Марина Пеливанова-Димовска, Христина Беловска и Лариса Милевска, како и експертите ангажирани на проектот, тим-лидерот Карстен Манке, Мартин Сопронов и Виктор Гратакос. Посетата во Стразбур се реализира во периодот од 3 до 7 март 2026 година.
