Делегации предводени од градоначалниците на италијанските општини Новело, Монфорте д’Алба и Родино деновиве престојуваат во Делчево, во рамки на возвратната посета со која се продлабочува соработката меѓу македонската општина и трите италијански партнери.
Градоначалникот на Општина Делчево, Иван Гоцевски, денеска оствари средба со градоначалникот на Новело, Марко Паларо, градоначалникот на Родино, Марко Андријано, како и со делегацијата од Монфорте д’Алба, предводена од Лука Роси.
На средбата беше нагласено значењето на меѓуопштинската соработка, особено во областите на економскиот развој, туризмот, културната размена и руралниот развој.
Гоцевски истакна дека е во тек процесот на официјализирање на збратимувањето со трите италијански општини преку потпишување меморандуми за соработка.
– Збратимувањето создава нови можности за економски развој, туризам и рурален развој, ги зајакнува врските на иселениците со родниот крај и отвора простор за инвестиции, како и за пренесување искуства и знаења. Особено ми е драго што нашите пријатели од Италија се во Делчево токму во деновите кога се одржуваат „Голачките фолклорни средби“, настан кој претставува можност за поврзување на луѓето, размена на култури и создавање трајни пријателства, изјави Гоцевски.
Во рамки на посетата, гостите од Италија ќе ги посетат повеќе знаменитости во Делчево и историското Разловци, а ќе присуствуваат и на концертните вечери и програмата на 31. издание на „Голачките фолклорни средби“.
За утре е закажана свечена седница на Советот на Општина Делчево, посветена на воспоставената соработка со општини од Република Италија. Советниците треба да донесат одлука за збратимување на Делчево и со италијанската општина Рикалдоне.
По завршувањето на седницата е предвидено потпишување меморандум, односно договор за збратимување на Општина Делчево со општините Новело, Монфорте д’Алба и Родино.
