По обилните врнежи што ја зафатија земјава, состојбата на терен постепено се стабилизира, информираат од Центарот за управување со кризи. Во Пелагонискиот регион, во Битола, Могила и Новаци, водата се повлекува од поплавените подрачја, иако реката Црна има покачен водостој, а дел од земјоделските површини сè уште се под вода.
Во Западниот регион, во Кичево, водостоите на реките се намалени и нема нови поплави. Во тек е расчистување и дезинфекција на поплавените домови, а евакуираните граѓани се сместени во спортската сала „Христо Узунов“.
Во Вардарскиот и Североисточниот регион проблеми предизвика и снегот. Во Кавадаречко се расчистуваат планинските патишта, додека во Ранковце е отежнат сообраќајот поради снежни наноси. Во Полошкиот регион, во Тетово е отстранета падната карпа на патот кон Бањиче, а кај Гостивар се расчистува одрон на патот кон Маврово.
Жителите на кочанското село Грдовци, кои викендов претрпеа штети откако Оризарска Река и Масалница се излеаа од своите корита, од денеска истите може да ги пријавуваат во Општина Кочани. По завршување на рокот за пријавување, општинска комисија ќе излезе на терен за да изврши увид, по што извештајот ќе биде доставен до надлежните институции и министерства.
Надојдената вода поплави земјоделски површини, подруми и дворови, а сериозно ја оштети и патната инфраструктура до населбата Добра Вода. Надлежните апелираат на внимателност и следење на состојбата на терен.
