Волонтери од Клубот на млади при Општинската организација на Црвен крст Куманово денеска реализираа превентивна акција за заштита на граѓаните од топлотниот бран. Во рамки на активноста, во централното градско подрачје беа поделени 120 шишиња вода и околу 120 едукативни флаери со препораки за заштита од високите температури.
Од Општинската организација на Црвен крст Куманово информираа дека преку непосредна комуникација со граѓаните, младите волонтери ја истакнале важноста од редовна хидратација во текот на летните денови и укажале на ризиците од изложеност на високи температури и ултравиолетово (УВ) зрачење.
Воедно, на граѓаните им биле дадени препораки да избегнуваат престој на отворено во периодот кога температурите се највисоки, да престојуваат во разладени простории или под сенка, да носат лесна и светла облека и редовно да внесуваат течности, со цел да се намали ризикот од здравствени последици предизвикани од топлотниот бран. Акцијата е дел од превентивните активности на Црвен крст Куманово насочени кон подигање на јавната свест за заштита на здравјето за време на летните горештини.
