Западно- нилската треска удира на повозрасната популација. Потврдени се нови 4 случаи на вирусот од страна на Инситутот за јавно здравје и сите се на возраст над 60 години. Досега се регистрирани вкупно 42 лица заразени со вирусот и четири починати пациенти.
-Заклучно со денес 4 лица се лабараториски потврдени на вирусот Западен-нил. Сите ново дијагностицирани се од Скопје од засегнатите општини. Лицата се на виозраст од 66 , 71, 84 и 75 годишна возраст. Вкупната бројка до сега на лица заразени со вирусот изнесува 42.– информираат од Центарот за јавно здравје
Најмногу заболени има во Драчево, општина Кисела Вода и рурални населени места во Гази Баба. Најголемиот дел се постари од 60 години, еден случај е на 25 годишна возраст, а засега нема заразени деца. Токму на повозрасните граѓани од засегнатите подрачја Министерството за здравство почна да им испраќа смс пораки за да ги информира како да се заштитат од комарци и кога да побараат лекарска помош. Се планира да се испратат 38.500 смс пораки.
Инаку извештајот за контролите на ДСЗИ потврди дека градот ја исполнил обврската за справување со комарците. Средствата со кои што е вршена дезинсекција уверува министерот за здравство Клековски дека се од листата препорачана од СЗО. Фокус во наредниот период ќе биде ставен на лоцирање на застоените води во општините каде има епидемија на Западно-нилска треска и дезинсекција од земја токму околу тие места. Здравствените власти посочуваат дека смртноста според прогнозите е околу 10 отсто од пациентите со воспаление на мозокот кои биле хоспитализирани. Остануваат препораките до граѓаните навремено да реагираат ако почувствуваат симптоми на Западен-нил и да се заштитат од комарците. Во утринските часови веќе беше извршена терестичка дезинсекција против комарци во Скопје а ќе биде и вечерва.
