Управата на рудниците Злетово и Тораница, компанијата „Булмак 2016“, најостро ги демантира и отфрла како целосно неточни објавите во дел од медиумите дека наводно се случил еколошки инцидент во рудникот Тораница, се наведува во соопштението од „Булмак 2016“.
Станува збор за невистинити и неточни информации, а дел од медиумите без никакви докази ја објавуваат и пренесуваат измислената информација за наводен еколошки инцидент.
Прво, веста дека е предизвикан еколошки инцидент е апсолутно невистинита. Најодговорно тврдиме дека не постои никакво истекување, инцидент или било каков еколошки прекршок што би можел да ја загрози животната средина или водите на Крива Река. Производствениот процес се одвива под континуиран надзор на стручните служби и во целосна согласност со А-интегрираната еколошка дозвола и важечката регулатива.
Второ, со оглед дека објавените содржини се темелат на невистини и предизвикуваат неоснована вознемиреност во јавноста, а истовремено нанесуваат сериозна штета на угледот и деловниот интегритет на компанијата, бараме веднаш да бидат повлечени сите објави со невистинити информации, како и да се објави јавно извинување и исправка на ист начин и на истото место каде што беа пласирани лажните тврдења.
Трето, „Булмак 2016“ повторно ја реафирмира својата посветеност на транспарентна соработка со сите медиуми, стоејќи на располагање за секое прашање од јавен интерес. Истовремено, како општествено одговорна компанија која се придржува до највисоки стандарди, нема да дозволиме да бидеме вовлечени во некоректни партиски пресметки и политички манипулации во пресрет на изборите.
Изразуваме жалење бидејќи ниту еден медиум досега не се обрати и не побара информации од нас како засегната страна.
Ги повикуваме медиумите да не објавуваат непроверени информации и да се воздржат од пренесување на наводи кои се измислени, а кои предизвикуваат забуна кај граѓаните и непотребна штета на нашиот колектив, вработени и локалната заедница.
„Булмак 2016“ ќе ги искористи сите законски и правни механизми доколку неточните информации не бидат повлечени и доколку не следи јавно извинување
— како од медиумите што ги објавија, така и од политичките субјекти кои тенденциозно се обидуваат да ја злоупотребат темата за дневнополитички цели.
Компанијата останува цврсто посветена на еколошката одговорност, законитоста и почитувањето на јавноста со која дели ист простор и ќе продолжи да ја гради довербата преку факти, а не преку манипулации.
„Булмак 2016“ останува посветена на транспарентност, законитост и одговорно работење во интерес на заедниците каде што функционира.
