Бугарскиот европратеник Илија Лазаров од ГЕРБ упати остри критики кон својот колега Томас Вајц, обвинувајќи го дека е под „туторство“ на премиерот Христијан Мицкоски и министерот Тимчо Муцунски. Поводот за оваа реакција е предлогот на Вајц за амандман со кој се доведува во прашање Вториот протокол од Договорот со Бугарија, кој е дел од преговарачката рамка.
„Секоја промена во европскиот консензус ќе ѝ даде на Бугарија право да стави вето на членството на Македонија“, изјави Лазаров во интервју за БГНЕС. Тој со недипломатски речник порача дека Скопје мора да се однесува „пристојно“ ако сака да биде дел од европскиот клуб и дека „францускиот предлог“ е завршена работа која мора да се спроведе без коментари.
