Стратешкото партнерство – шанса за македонскиот градежен сектор. Стопанската комора очекува домашните компании да имаат 70% учество во изградбата на брзата пруга од Табановце до Гевгелија и обновата на болниците во Штип, Кичево и Тетово. Признаваат дека нивните капацитети се делумно ограничени за да можат да ја поддржат широката градежна експанзија низ земјава, но подготвени се да работат во нискоградбата. Првиот човек на комората, Бранко Азески вели дека македонските градежни компании долго биле запоставени и затоа било важно тие да бидат вклучени и проектите да ги изработат квалитетно.
За министерката за финансии, пак, поддршката на Британија е најголема што земјава ја имала и таа е од клучно значење. Притоа појасни дека Обединетото Кралство ќе гарантира дека Македонија кога ќе ги земе парите, истите ќе ги врати. Димитриеска Кочоска вели дека засега е јасно дека ќе се повлечат 2,2 милијарди евра за изградба на пругата и болниците, но дека за остатокот треба допрва да се аплицира со проекти. Тоа не значело дека ќе се повлече цела сума од 6 милијарди евра.
На средбата на министерката со бизнисмените во Стопанската комора било разговарано и за намалување на царинските стапки. По поголемиот пад пред две години, сега останатите царински стапки ќе се намалат за 50%. Азески вели дека генерално е задоволен од работата на Владата, но и дека треба да се забрза процесот на дигитализацијата и да се подобри комуникацијата на администрацијата со бизнисот. Исто така, со министерката била договорена и рамка за пребивање и враќање на парите кон компаниите што го платија солидарниот данок, кој потоа падна на Уставен суд.
