Лошото момче во дворецот на Али Ахмети. Според неговата сегашност и минато вака можеме да го оцениме Бекир Незири, поранешниот министер за економија, сега шеф на чаирскиот огранок на ДУИ, човекот кој синоќа со лисици беше донесен во суд, па пуштен на слобода.
Скандалозниот напад на контролори на летање е само еден од серијата во кој е вклучен тој. Неговите скандалозни дејствија за кои пишуваа медиумите почнуваат уште во 2010-та година, кога беше еден од директорите токму во М НАВ. Тогаш турнал по скали контролор како инструктор бидејќи не сакал да му потпише дека поминал обука за контролор.
Медиумите објавуваа дека снимките од нападот биле избришани, а контролорот избркан од работа на барање на Незири, по што заминал во Норвешка. Овој инцидент го потвдил и тогашниот претседател на Управниот одбор на М НАВ, Живко Поповски. Инцидент Незири направил и при одлуката да биде разрешен контролорот.
-Точно е тоа што сте го слушнале. Разговаравме за предлогот на Незири да биде разрешен еден од вработените. Јас се спротивставив, со забелешка дека тоа е добар работник, на што Незири ми рече дека тој одлучувал за неговите. Му реков дека безбедноста на летањето е неделива, нема наши и ваши. Продолжението го знаете, ме плисна со вода, кажал Поповски.
Беким Незири беше првиот и засега единствен од највисоките функционери на ДУИ, кој од министер на СДСМ беше поврзуван со криминал вреден 19 милиони евра. Тогаш Царовска објави дека ПИОМ, каде директор одреден период беше токму Незири, со години не ги уплаќал придонесите на илјадници осигуреници во вториот пензиски столб.
-На овие 12 илјади наши сограѓани, воопшто придонесите не биле префрлани кон вториот столб, иако од работодавачот придонесот бил уплаќан. Финансиските средства останувале во пензискиот систем, но во првиот столб, изјави Царовска.
Тогаш во одбрана на Незири веднаш застанаа од ДУИ. Несреќни биле зборовите на Царовска, според тогашниот вицепремиер за европски прашања, сега министер за надворешни работи, Бујар Османи.
-Јас морам тука да кажам дека вчера имаше несреќна изјава на министерката Царовска, која што отвори можност за спектакуларно, за спектакуларни шпекулации во однос на тоа што се случило по Фондот за пензиско и инвалидско осигурување, за некаква можност за злоупотреба, изјави Османи
Одбраната за Незири ја имаше и вчера, сега од директорот на М НАВ, Фахрудин Хамиди. Делото за кое многумина правници велат дека може да се карактеризира како тероризам било кошкање меѓу двајца колеги.
-Но, се работи за конфликт меѓу двајца колеги кои што се знаат 20 години и заедно биле на школување. Кошкање има во секоја организација, има набој на енергија. Значи да се разбереме, не се сите на една страна или втора страна, изјави Хамиди.
Инаку, Незири важи за еден од најблиските соработници на Артан Груби, беше поставен за шеф на чаирскиот огранок на ДУИ, откако Изет Меџити ја формираше партиската фракција и подоцна реши да се раздели од ДУИ.
Матеја Петровски
