„Бараме достоинствена плата“, „ Доста работиме за ѓеврек и вода“, Долу капиталот, ослободување на трудот“. Со овие транспаренти синдикатите традиционално излегоа на протестен марш за Денот на трудот. Работниците протестираа пред законодавниот дом, Владата и стопанските комори. Барањата годинава се покачување на минималецот на 500 евра, зголемување на сите останати плати во државата за 100 евра и почитување на колективните договори. Им свртеа грб на пратениците, и како што рекоа револтирани од нивните привилегии и превисоки плати кои не ги заслужуваат, им порачаа „лебот ваш е од трудот наш“.
„Жалосно е да уживаат привилегии, 79% зголемени плати, трошоци за превоз поголеми од минималната плата, собраниско бифе поевтино од работничка менза, а да одбиваат да донесат измени и дополнувања на Законот за минимална плата, нејзино зголемување на 500 евра, за 100 евра зголемување на платите на останатите работници, да имаат право работниците како и пратениците на трошоци за превоз и трошоци за храна“ – вели Слободан Трендафилов, претседател на ССМ.
Синдикатите беа особено гневни на работодавачите. Пред стопанските комори им порачаа на газдите дека работниците им го заработуваат лебот и недостоинствено е за пристојната работа да добиваат само трошки од профитот.
Од пред Владата, порачаа дека без работници нема економија, развој , ниту иднина. Побараа од Владата да го следи примерот на владите во соседството кои ги покачија платите. Сметаат дека тоа е логичен чекор, кој ќе придонесе и за полнење на буџетот преку поголеми даноци и придонеси од работниците.
На крај, синдикатите им се заблагодарија на новинарите и снимателите кои го проследија нивниот протест, но и ги предупредија работодавачите, дека медиумските работници и сите кои денеска работат на празник, треба да добијат 250% празнична дневница.
