Австралија е во шок по масовното пукање на плажата Бонди во Сиднеј, каде што двајца напаѓачи убија 12, а ранија најмалку уште триесетина лица. Нападот се случил на плажата каде што имало стотици луѓе собрани по повод празникот Ханука.
Снимките направени од локалното население прикажуваат двајца мажи, облечени во црно, како пукаат со пушки. Напаѓачите се неутрализирани – едниот е мртов, а вториот се наоѓа во критична состојба. Целиот чин бил снимен од страна на присутните локални жители.
Австралиските власти го прогласија нападот за терористички, а полицијата истражува дали во нападот учествувало и трето лице. Еден од напаѓачите е идентификуван како 24-годишник од Авганистан, кој живеел во југозападниот дел на Сиднеј.
Израелскиот претседател Исак Херцог изјави дека Евреите кои отишле да ја запалат првата свеќа за Ханука на плажата биле нападнати од, како што рече, „одвратни терористи“.
Бонди, една од најпознатите плажи во светот, обично е преполна со локални жители и туристи, особено за време на топлите викенд-вечери.
