Папагали, овци, лего коцки, магионичари, принцези и вештерки. Со „априлилили“ дечињата го започнаа утрото. Денот на шегата традиционално ја разбуди креативноста кај родителите и децата, а секоја маска донесе насмевки и среќа. Први април како и секоја година ја претвори фантазијата во реалност, а хуморот измами насмевки кај секого.
„Јас сум маскирана во Алиса на земјата на чудата, јас сум спајдрмен, а јас сум Вендсдеј. Јас се маскирав во директорка и ја одбрав оваа маска затоа што сакам да бидам директорка кога ќе пораснам“– велат дечињата.
Родителите велат дека одбележувањето на овој ден е од огромна важност пред се за најмладите, но и за нив. Како што велат, со манифестациите кои се организираат за денот на шегата се испраќаат пораки за прифаќање на различностите и соработка без разлика на истите.
„Многу позитивно влијаеше и на родителите и на децата, децата се многу креативни, со многу идеи, научија да споделуваат, разменуваа материјали и научија дека секое мислење е важно. Ова е можност да ги научиме нашите деца освен на забава и на нешто креативно, да ги научиме на трпение. Меѓутоа ние денес испраќаме многу силна порака – прифаќање на различноста, другарство, пријателство и заедничка работа.“– велат родителите.
Во ГТЦ традиционално се одржа Априлијада која што обеднини дечиња и родители од различни училишта и градинки. Организаторите истакнуваат дека настанот носи радост и креативност и помага да се врати позитивниот дух во Скопје.
„Ова што денес може да се види да се соберат дечиња од сите градинки од училишта во главниот град мислам дека е добар момент да го практикуваме и во перспектива се со цел да ја вратиме душата на Скопје зошто па и најмладите се душата на градот. Во насока на тоа ќе продолжиме како град да ги подржуваме овие настани и манифестации.“– вели градоначалникот на град Скопје, Орце Ѓорѓиевски.
„Многу е важен овој настан и за градот и за децата, но и за целата поширока јавност бидејќи сакаме да го вратиме доброто расположение да биде повторно во мода. Да бидеме среќни, радосни, весели, креативно да се изразат децата, па еве и ние возрасните.“– вели директорката на Детски културен центар – Карпош, Билјана Лалчевска Серафимовска.
Театарски изведби, песнички, танцови од балетски и хип- хоп студија како и диџеи ја исполнија атмосферата со радост и среќа кај сите генерации. Априлијадата традиционално се оддржува секоја година и е подржана од Град Скопје.