Директорот на Бирото за јавна безбедност Александар Јанев, денеска присуствуваше на настан во организација на Оперативно-техничката агенција (ОТА) кој имаше за цел да го поттикне користењето на акредитираната платформа за пренос на класифицирани информации.
-Пред присутните порачав дека ова не е проект за удобност, туку проект за иднината. Ние не градиме само дигитален канал, туку воспоставуваме нов систем на доверба меѓу институциите во кој секоја одлука е евидентирана, секоја наредба заштитена, а секој чекор проследен со отчетност. Тоа е моделот што сакаме да го оставиме за идните генерации на истражители, обвинители, судии и бранители на правдата, вели Јанев.
Тој посочува дека дигитализацијата е неопходна не заради тренд, туку заради безбедност, ефикасност и праведност.
-Ако сакаме да се справиме со организираниот криминал, мора прво да изградиме современи, отпорни и ефикасни системи кои ќе ги поддржат институциите. Се заблагодарувам на ОТА за техничката поддршка, на обвинителствата и судовите за нивната професионалност и на сите што ја препознаваат вредноста на оваа иницијатива. Ова не е само технолошка надградба, туку е заеднички проект, заедничка обврска и визија за поефикасен и побезбеден систем. Со заедничка и посветена работа можеме да изградиме сигурна, модерна и транспарентна безбедносна рамка – во интерес на институциите, но пред сè во интерес на граѓаните, објави Јанев.
Директорот на БЈБ во своето обраќање нагласи дека воведувањето на овој систем ќе го редефинира начинот на кој се доставуваат и разменуваат строго доверливи судски наредби – со фокус на посебните истражни мерки, согласно член 252, став 1, точка 1 од Законот за кривична постапка.
-Тоа што досега беше бавен и ранлив процес, со премногу раце и премалку отчетност, денес го претвораме во затворен, автоматизиран и безбеден дигитален систем, каде секој потег е евидентиран, секој документ е заштитен, а секоја минута е добиена – за акција, за вистината, за правдата. Овој систем е повеќе од технолошко решение – тој е вредносна одлука, истакна директорот Јанев.
Јанев го прецизираше процесот како ќе изгледа во пракса.
-Министерството за внатрешни работи ќе изготвува предлози за посебни мерки и ќе ги испраќа по електронски пат до обвинителството. Обвинителството ги разгледува и ги проследува до судот, кој потоа електронски ја носи одлуката. Судските наредби се враќаат – една до МВР, друга до ОТА – Скопје, во анонимизиран формат. Сè се одвива во заштитена дигитална средина – без хартија, без чекалници, без ранливи човечки алки, заврши директорот Јанев.
