Потребни се итни законски реформи поради тридецениското доцнење на нашето семејно законодавство. Потребата од темелни реформи е поради фактот што се соочуваме со голем број на семејни и родови насилства и нарушени семејни односи. Ова беше заклучокот на конференцијата на која учествуваа еминентни професори од областа на семејното право, судии, адвокати и претставници на невладини организации. Апелираат час поскоро да се случат овие промени со цел да се превенира и да се подобри заштитата на сите членови во семејството.
-Нас науката не нѐ натера да ја организираме оваа конференција, сѐ со цел да иницираме реформи, затоа што семејството и правата на детето се најзначајниот сегмент од општеството. Како наука чувствуваме лична одговорност да ѝ помогнеме на државата“, изјави проф. д-р Ангел Ристов – претседател на Институтот Јуридика Прима.
Како една од главните причини да се реагира е целта да се обезбеди и подобри заштитата на правата и интересите на децата.
Се предлага заедничко вршење на родителското право и по разводот на бракот и се предлага моделот на поделено родителство. Тој е присутен веќе подолго време, повеќе децении во голем број европски законодавства и со тој модел се обезбедува децата по разводот на бракот да поминуваат и кај едниот и кај другиот родител“, изјави проф. д-р Дејан Мицковиќ – професор на Правниот факултет
На конференцијата беше посочено дека се зголемува бројот на дисфункционални семејства, расте бројот на разводи и на семејно насилство и токму поради овие причини беше посочено дека е време да се постапува превентивно. Дел од предлозите беа да се вратат предбрачното советување и советувалиштата како превентива во зачувување на брачните заедници и родителството. За сето ова да се реализира потребни се повеќе ресурси и поголема поддршка, но и повеќе да се работи за да можат жртвите на семејното насилство да се потпрат на институциите.
