Продажба на хамбургери, тостови, пирошки, крофни со сомнително потекло. Агенцијата за храна и ветеринарство изрече 15 забрани за вршење на дејност на сендвичарници, продавници и оператори со храна во близина на основни и средни училишта. Ова се продажни објекти во кои најчесто учениците купуваат ужина за време на одморите. Во голема акција во изминатите 10 дена, Агенцијата за храна и ветеринарство, спровела засилен инспекциски надзор и изврпила 445 контроли на цела територија на државата. Освен тоа што 15 објекти сега имаат клуч на врата, биле запленети и уништени речиси 700 килограми храна за кои инспекторите утврдиле дека се небезбедни за консумирање или пак дека производи и храна со непознато потекло. Некои од прекршоците вклучуваат работа во лоши хигиенски услови, немале добра производствена и хигиенска пракса, некои не исполнувале основни технички услови за работа, не вршеле редовно дезинфекција, дезинсекција и дератизација, а два објекти воопшто не биле регистрирани во Агенцијата.
„19 оператори пуштале во промет небезбедна храна, кај 30 биле забележани лоши хигиенски услови, а дури 26 работеле без да бидат регистрирани во Агенцијата з ахрана и ветеринарство. Проблеми се констатирани и во организацијата и стандардите на работење. 16 оператори воопшто немале имплементирано процедури за добра хигиенска и добра производствена пракса, додека кај триесет и двајца не бил спроведен задолжителниот здравствено-санитарен преглед на вработените. Во три објекти немало извршено редовна дезинфекција, дезинсекција и дератизација, а седум не ги исполнувале основните технички услови за работа. Во исто толку случаи е затекната и несоодветно означена храна“ – АХВ.
Поради сите овие пропусти кои се закана врз здравјето на граѓаните, Агенцијата за храна и ветеринарство изрече 77 парични казни со вкупна вредност од 36.470 евра. Биле издадени и 103 решенија со задолжение операторите да ги отстранат недостатоците, како и 23 опомени пред пишување глоби. Од Агенцијата за храна и ветеринарство информираат дека ригорозните контроли на продажните објекти околу училиштата ќе продолжат и во наредниот период и дека фокусот и понатаму ќе остане безбедноста на храната што секојдневно ја консумираат децата. Во изминатиов период, Агенцијата врши засилени вонредни контроли и кај други оператори со храна, меѓу кои месарници, ресторани, сендвичарници и маркети. Минатата недела пак, заплени и уништи дури 37 тони храна – грав, леќа, ореви, лешници и други јаткасти плодови со изминат рок повеќе од 2 години.
