Прво тврдеше дека нема никаков контакт со него, а сега се фали дека тој лично го вратил Артан Груби во Македонија.
Лидерот на ДУИ, Али Ахмети, тврди дека лично побарал неговата десна рака, Груби, да се врати во Македонија и да се соочи со одговорност за каква било злоупотреба на довербата, надевајќи се дека Груби ќе биде ослободен од домашен притвор и дека постапката ќе продолжи.
„Јас бев главниот поддржувач кој побара Артан Груби да се врати во Македонија за да го преземе процесот. Му реков директно: „Ако си ја злоупотребил мојата доверба, ќе одговараш“. Тој се заколна дека ќе работи чесно. И единствениот збор што ми го кажа беше: „Работев чесно“ – рече Ахмети за РТВ-21 од Приштина.
Истиот Ахмети, во 2024 година, кога Груби исчезна од Македонија, пак тврдеше дека нема никаков контакт со бегалецот.
„Лично немам никаков контакт со Артан Груби и немам детални информации за неговата моментална локација. Мојот коментар се засноваше на она што јавно го кажаа владините претставници, како и на фактот дека тој легално ја преминал границата.“
