Министерот за животна средина и просторно планирање, Муамет Хоџа, вчера оствари работна средба со амбасадорот на Кралството Шпанија, Рафаело Сориано Ортиз, на која се разговараше за напредокот и имплементацијата на клучните тековни проекти за заштита на животната средина, пишува во денешното соопштение на Министерството за животна средина и просторно планирање.
Како што се истакнува во соопштението, на средбата била истакната поддршката од Кралството Шпанија за евроинтеграцискиот процес, особено во усогласувањето на националното законодавство со стандардите на ЕУ и зајакнувањето на институционалните капацитети во секторот животна средина.
– Добрата билатерална соработка меѓу двете земји се одразува и преку реализацијата на повеќе проекти поддржани преку ИПА-програмата, а во кои учествуваат шпански институции и компании – додаваат од Министерството за животна средина и просторно планирање.
Соговорниците ја нагласиле заедничката определба за понатамошно унапредување на партнерството и размена на искуства и добри практики, како значаен придонес во спроведувањето на реформите и усогласувањето со европските стандарди во областа на животната средина.
