Државни електрани ќе се жалат на одлуката за запирање на гонењето на осомничените за спорната набавка на мазут за ТЕЦ Неготино. Од ЕСМ велат дека штом го добијат решението од Обвинителството за организиран криминал, ќе ја обжалат одлуката за да се заштитат интересите на Компанијата.
- „До овој момент, до АД ЕСМ сè уште не е доставено Решението од ОЈО ГОКК во врска со осомничените за тежок криминал – набавка на мазут за ТЕЦ Неготино. Сепак, следејќи ги информациите објавени во медиумите, правниот тим на Компанијата веќе ги презема сите подготвителни активности, да поднесе соодветна Жалба, веднаш по официјалното примање на Решението. АД ЕСМ ќе ги искористи сите правни механизми кои ни стојат на располагање за заштита на интересите на Компанијата“велат од ЕСМ.
Доколку предметот не биде преиспитан, Обвинителството ќе го изгуби кредибилитетот, предупреди премиерот Христијан Мицкоски кој остро реагираше по одлуката да ја запре истрагата во која беа опфатени поранешниот директор на ЕСМ, Васко Ковачевски, бизнисменот Ратко Капушевски и сопственикот на „Пуцко Петрол“, Асмир Јахоски.
- „Со неверување ја слушнав таа вест. Второ бев шокиран од тоа што го слушнав. Добро е што АД ЕСМ, поранешно ЕЛЕМ, кога ќе ја добие одлуката ќе вложи жалба. И очекувам дека случајот пак ќе се разгледа и повторна анализа, затоа што ако тоа не се случи Обвинителството за организиран криминал и корупција го изгуби својот кредибилитет, Обвинителството на Ислам Абази, сме го коментирале и не треба што друго да кажам “, рече Мицкоски.
Ниту републичкиот обвинител Ненад Савески, не бил информиран за одлуката, така му кажал на премиерот кој побарал став од него зошто се запира истрагата за мазутот.
- „Вчера разговарав и со јавниот обвинител Ненад Савески. Тој рече дека не бил информиран за оваа одлука на Ислам Абази“, рече Мицкоски.
Савевски и вчера за медиумите рече дека предметот не бил рефериран во републичкото јавно обвинителство, а обвинителката Катерина Коларевиќ кој ја водеше истрагата му јавила телефонски.
Според Коларевиќ не биле пронајдени доволно докази за кривично дело, ниту била утврдена штета за државата. Во услови на енергетска криза, набавката на мазут овозможила ТЕЦ Неготино да произведува струја по значително пониски цени од тие на берзите и со тоа биле избегнати рестрикции, велат од обвинителството.
Истрагата беше отворена по кривична пријава на МВР, во која се тврдеше дека преку спорните набавки е направена штета од над 167 милиони евра и постоеле сомнежи за перење пари.
