По само два месеци откако беше исчистен комуналниот и градежниот отпад, изворот Шум во Струга повторно е под сериозна закана од загадување. Овој пат заштитеното подрачје се полни со кабаст отпад и угинати животни. Директорот на јавното водоводно претпријатие, кој веднаш интервенирал, упати апел до институциите соодветно да одговорат и да ги казнат несовесните.
Се преземаат, вели, мерки за санација на изворот Шум, од кој со вода се снабдуваат цела Струга и струшкиот регион, но мора да се стави крај на ваквото самоволие. Иако има забрана за движење, месното население гравитира во строго забранетата зона, каде сè уште функционира ресторан со тоалети и септички јами.
„Несериозно и жално е што некој дозволил да се експлоатира огромна површина над изворот и да се нанесе непроценлива штета, која нè доведува во опасност да ги изгубиме изворите, квалитетот и издашноста на водата. За жал, мораме да бидеме реални дека постои опасност градот Струга, од град на две води, да остане без вода“, вели Јованчо Мечкароски, директор на Ј.П. „Водовод“ Струга.
Во моментов се спроведува правната процедура за формирање заштитни зони, како и добивање дозвола за легално користење на Шум.
„И по завршувањето на целата постапка, истата ќе биде поднесена и на владина седница и владина процедура за донесување конкретна одлука“, вели Мухамед Хоџа, министер за животна средина.
Од Основното јавно обвинителство во Струга уште еднаш го потврдија ставот дека се вршат повеќе комплексни вештачења на квалитетот на водата и на причините што довеле до загадувањето. На лице место се повикани и стручни лица – геодет и геолог, а се очекуваат и резултатите од наредените вештачења, со цел да се донесе јавнообвинителска одлука.
Во меѓувреме, забраната за ископ во близина на изворите останува на сила, а обвинителството презема и повеќе други дејствија.
Две правни лица од Велешта веќе се сомничат за кривични дела – незаконита експлоатација на минерални суровини и загадување на водата за пиење во близина на изворите во Шум.
