Да ја чуваме кирилицата и јазикот. Во време на негирања и оспорувања од страна на Бугарија, потребата од правилна употреба на македонскиот јазик е поголема од кога било, посочуваат истакнати македонисти. По повод 5 Мај, Денот на македонскиот јазик, во Институтот „Крсте Мисирков“ се одржа свеченост со настапи на ученици и обраќања на професори и научни работници. Директорката на Институтот Грујовска, испрати порака до сите граѓани, особено најмладите генерации, да пишуваат на кирилица, како што пишувале нашите родители, баби и дедовци, но и борците за слобода.
„Кирилицата е нашето богатство, нашето културно наследство што нè прави свои препознатливи, различни и единствени во Европа и во светот“, изјави Елена Јованова Грујовска – директорката на Институтот по македонски јазик „Крсте Мисирков“.
„Да ја сочуваме, негуваме и развиваме и усовршуваме македонистиката како поддржувач научен поддржувач на македонскиот јазик“, изјави Кристина Николовска директор на МСМЈЛК при УКИМ во Скопје.
За професорот Арсов, македонскиот јазик има сигурна иднина затоа што никогаш не бил статичен. Природно успеал да ги спои традиционалното и современото и зад него стојат луѓе истражувачи, учители, писатели, но пред се обични зборувачи кои го живеат јазикот и им го пренесуваат на идните поколенија.
„Македонскиот јазик денес живее во еден особено интересен момент. Од една страна тој е целосно афирмиран стандарден јазик, со своја традиција, литература, научна обработка. Од друга страна се соочува со нови предизвици, дигиталната комуникација, глобализацијата, влијанијата од други јазици. Тој природно ги спојува традиционалното и современото, а зад него стојат истражувачи, учители, писатели, но пред сè обичните говорители кои го живеат јазикот и го пренесуваат на идните генерации“, изјави професор Борче Арсов од Инститот за македонски јазик „Крсте Мисирков“.
Годинава, Институтот одбележува 100 години од смртта на Крсте Мисирков, првиот кодификатор на македонскиот јазик, како и 105 години од раѓањето на Блаже Конески, неговиот конечен кодификатор.
