Институтот за македонски јазик е првата институција во Македонија која на 5 мај 2019 година го одбележа Денот на македонскиот јазик и затоа остануваме верни на традицијата, истакна професорката д-р Елена Јованова-Грујовска, директорка на Институтот за македонски јазик „Крсте Мисирков“-Скопје, институција која свечено го одбележа 5 мај Денот на македонскиот јазик.
Пред аудиториумот на денешната свеченост, Јованова-Грујовска потсети дека оваа година Институтот одбележува 100 години од смртта на Крсте Мисирков, патрон и како што рече најзначајниот Македонец на 20 век и првиот кодификатор на македонскиот јазик.
– Одбележуваме 105 години од раѓањето на единствениот Блаже Конески, конечниот кодификатор на македонскиот јазик, 85 години од погибијата на Коле Неделковски, 20 години од смртта на великиот Петре М. Андреевски, а оваа година Македонија одбележува 60 години „Струшки вечери на поезијата“,…заедничко за сите нив е негувањето, чувањето и издигнувањето на македонскиот јазик. Сите книги, песни, стихови се напишани со кирилица. Кирилицата е единствена македонска азбука, таа е нашето писмо што не дефинира пред светот како единствени и посебни. Нашата порака е до сите граѓани во Македонија, особено до младите генерации, да пишуваме со кирилица како што пишуваат нашите родители, нашите баби и дедовци, како што пишувале нашите борци за слобода. Кирилицата е нашето богатство, нашето културно наследство што не прави свои, препознатливи, различни, единствени во Европа и светот. Нашата задача е да создаваме на македонски јазик, нагласи Јованова-Грујовска.
Професорката д-р Христина Николовска, директорка на Меѓународниот семинар за македонски јазик, литература и култура потсети дека во последниве три години во Европа отворени се три нови лекторати, а ќе се возобноват згаснатите.
-Денес свечено се потсетуваме на вековниот процес на раст на македонскиот јазик кој што се развивал со процесите на описменување, просвета, творештво, книжевност, култура и наука. Денес македонистиката е студиозна, компетентна, стабилна наука која се развива во светски рамки. Меѓународниот семинар при УКИМ е континуирано посветен на развој на лекторатите на македонски јазик во странство и на центрите во кои се изучува македонистиката. Во последните три години се отворија три нови лекторати по македонски јазик во Тирана-Албанија, во Нитра-Словачка и се возобнови стариот лекторат во Неапол-Италија. Радува фактот што во светот има голем интерес за македонскиот јазик. Пред нас е отворање на нови лекторати и возобнова на згаснатите, најави Николовска.
За Денот на македонскиот јазик во Институтот за македонски јазик „Крсте Мисирков“-Скопје беше приредна и уметничка програма.
