Недоволната застапеност во локалната власт, административните пречки, ограничениот пристап до основни јавни услуги и долгите патувања до институциите ги примораа Македонците во Голо Брдо и Гора во Албанија да се здружат и да поднесат барање за формирање на свои две нови општини.
На тој начин се надеваат дека конечно ќе добијат еднаков третман како и сите граѓани во Албанија. Посочуваат дека во државата веќе постојат општини формирани врз етнички и регионален принцип, како што е Пустец за Македонците, но и уште неколку општини за грчката заедница.
Оттука, логично и праведно е истиот принцип да важи и за Македонците во Голо Брдо и Гора и тие да добијат можност самите да одлучуваат за својот локален развој, да го зачуваат идентитетот и да обезбедат подобри услови за живот. Еден од иницијаторите на барањето, поранешниот градоначалник на Пустец, Темелко, вели дека Македонците во овие региони не бараат привилегии, туку само еднаков третман.
„Голо Брдо и Гора не бараат привилегии, бараат правда, бараат сами да одлучуваат за својот локален развој, да го зачуваат својот македонски идентитет и да имаат еднаков третман како и сите други заедници во Република Албанија“, изјави Едмонд Темелко – поранешен градоначалник на Пустец.
Заедно со Елена Горица Симонофски, тие го поднесоа барањето до надлежната комисија во Албанскиот парламент, кој веќе работи на новиот закон за територијална поделба. За нив, барањето има цврста правна основа и истото им е загарантирано со албанскиот устав и меѓународните конвенции за правата на малцинствата. Се надеваат дека надлежните конечно ќе имаат слух за нивните проблеми и дека нивното барање ќе биде прифатено.
„Се надеваме ние нашето ќе го сториме, нашето барање е доставено до оваа комисија, потоа ќе ги известиме сите меѓународни претставници, ќе се достави до сите релевантни амбасади, меѓународни институции кои делуваат во Албанија, се надеваме дека со напорна поддршка и од самата матична држава, имаме голема поддршка, еве на 10 мај очекуваме посета на премиерот Христијан Мицкоски, во едно кратко време по третпат дојде во Албанија, нè посети, се надеваме заеднички да се избориме, навистина оваа неправда да биде на свое место и Македонците, жителите од областа Голо Брдо и Гора, исто како Пустец да си имаат своја општина и да си одлучуваат за својата иднина. Во Албанија има еден проблем, останатата политика од претходниот систем дека Македонци се признаваат само регионално, освен во областа во Мала Преспа, со тоа се дава можност во овие две области самите Македонци да се организираат, да си го чуваат својот македонски идентитет, да се развиваат такви какви што се – Македонци“, изјави Едмонд Темелко, поранешен градоначалник на Пустец.
Во услови на зголемено иселување и долгогодишна запоставеност, жителите на овие региони ја гледаат оваа иницијатива како можност за подобра иднина и дека барањето за свои општини нема да донесе само административна промена, туку чекор кон подостоинствен живот.
