Нови 100 амбулантни возила вредни 7,5 милиони евра добива македонското здравство.Распишана е јавната набавка и во моментов тече законскиот рок во кој заинтересираните компании можат да ги поднесуваат своите понуди.
Возилата ќе бидат распределени низ целата држава, со приоритет за здравствените домови кои имаат најголем број пациенти и недостиг на возила.
Очекувањата на надлежните, се дека со новите медицински комбиња ќе се подобри работата на брзата помош, транспортот на пациентите до болница ќе биде побрз, а ќе биде подобра и покриеноста во урбаните и во руралните средини.
„Набавката на 100 нови амбулантни возила значително ќе го унапреди капацитетот на здравствениот систем за одговор при итни состојби и ќе овозможи побрза и поефикасна интервенција со брз и навремен транспорт на пациенти до соодветните здравствени установи. За возилата е предвидена надградена медицинска опрема“,велат од Министерството за здравство.
Според медицинскиот персонал силната инекција за здравството од сто нови , модерно опремени амбулантни возила ќе биде од голем бенефит за пациентите и здравствените работници.
Конкретно, главната служба за итна помош во Скопје располага со десетина исправни возила што секојдневно функционираат. Според раководството оваа бројка е многу мала за остварување на сите услуги во главниот град.
Инаку, возниот парк на здравствените установи изминативе десетина години најмногу се обновуваше преку донации.. Последен пат јавното здравство во Македонија доби 25 нови амбулантни возила во 2020 година. Од нив 12 беа за Итна помош, шест беа распределени во Скопје, а другите шест во здравствените домови во Крушево, Кичево, Крива Паланка, Берово, Струга и Дебар, што беше само капка во морето од потреби. 13 возила беа наменети за единицата за домашно лекување во градот Скопје.
