По завршените подготвителни работи и асфалтирањето, реконструкцијата на атлетската патека на Градски стадион „Зоран Паунов“ во Велес влегува во завршна фаза. Градоначалникот Марко Колев информира дека изведувачот веќе го обезбедил потребниот тартан, кој е донесен и подготвен за финално поставување.
Тој најави дека со стабилизирање на временските услови ќе биде комплетирана реконструкцијата на патеката, што претставува исполнување на долгогодишно барање на велешани.
Проектот, вреден околу 20 милиони денари, Општина Велес го реализира во соработка со Министерството за спорт, со финансиска поддршка од Владата.
-Ова е значајна инвестиција во спортот и здравјето на граѓаните- истакна Колев.
Атлетската патека, која во изминатите години беше целосно руинирана и неупотреблива, е изградена во 1982 година и во тоа време важела за една од најубавите во поширокиот југословенски регион. Со текот на времето и поради долгогодишна употреба, таа значително се оштети, поради што спортистите и рекреативците од Велес со години бараа нејзина целосна обнова.
