Изградба на професионална и ефикасна јавна администрација усогласена со европските стандарди е еден од клучните приоритети на Македонија на патот кон членство во Европската Унија, порача министерот за јавна администрација Горан Минчев во обраќањето на Министерската конференција „Од реформи до подготвеност: градење лидерство и таленти за пристапување во Европската Унија“, одржана во рамки на Берлинскиот процес.
Како што соопштуваат од Министерството за јавна администрација, во своето излагање, министерот нагласил дека Македонија веќе спроведува суштински и системски промени насочени кон изградба на професионална, ефикасна и департизирана јавна администрација, усогласена со европските стандарди.
– Патот кон Европската Унија не се гради само преку усогласување на законите, туку преку институции што функционираат и администрација која испорачува резултати – истакна министерот.
Тој потенцираше дека реформите се темелат на зајакнување на лидерството, воспоставување на современа законска рамка и забрзување на дигиталната трансформација, при што беше нагласено донесувањето на новите закони за административни службеници, за вработените во јавниот сектор и за обука и стручно усовршување, како и подготовката на Законот за високи раководители со кој се воспоставува јасен и мерит-базиран систем за избор и оценување на раководниот кадар.
Посебен акцент беше ставен и на воспоставувањето на Академијата за обука на административните службеници како клучен механизам за континуиран професионален развој и градење на нова генерација јавни службеници.
– Инвестицијата во знаење и компетенции е инвестиција во силни институции и одржлива европска иднина – нагласи министерот.
Во рамки на конференцијата, учесниците усвоија заеднички заклучоци кои ја рефлектираат заедничката визија за иднината на јавната администрација во регионот.
Беше нагласено дека професионална и ефикасна јавна администрација е клучна за демократско управување и напредок кон ЕУ, при што зајакнувањето на капацитетите, мерит-системот и политичката посветеност се стратешки приоритети. Силното лидерство, управувањето со таленти и добрите работни услови се важни за ефективни институции, додека, дигиталната трансформација и агилноста ја подобруваат ефикасноста и транспарентноста.
Исто така, беше истакната улогата на регионалната мобилност поддржана од РеСПА како алатка за размена на знаења и приближување кон ЕУ практиките.
