Бугарија добива силна Владата и иден премиер со голема поддршка и политичко Убедливата победа на поранешниот бугарски претседател Румен Радев е очекуванa според претседателката Гордана Сиљановска Давкова , која што има и повеќе од добри односи со идниот шеф на бугарската Влада. Таа вели токму таа сила може да биде шанса за решавање на наталожените проблеми од честите политички кризи во земјата. Според македонската претседателка со силна влада во Софија се отвора простор за напредок, особено во време на зголемени безбедносни предизвици во Европа, и очекува разговори помеѓу двете држави каде што ќе трагаат по ново решение за билатералниот спор за откочување на нашите евроинтеграции.
“Сум го запознала господинот Радев, многупати сум го сретнала. Не се согласуваме за полно работи, но умееме да се сослушаме со почит и да заклучиме дека ќе бараме решение. Да потсетам, Балканот секогаш бил зона за тестирање на односите на големите сили, лакмус, тоа сигурно ќе биде и сега и јас очекувам третирање на проширувањето не само низ призма на поголема ЕУ, компетитивна на глобалната политичка сцена туку и поголема безбедност. Ние имаме 100 проценти усогласена надворешна и безбедносна политика со ЕУ и повеќе држави од регионот – Црна Гора и Албанија, и очекувам да се видиме да разговараме, се разбира со двете знамиња и да трагаме по ново решение” – вели претседателката Гордана Сиљановска Давкова.
Покрај претседателката, и македонската Влада очекува конструктивен пристап од новиот бугарски лидер Румен Радев по изборната победа. Премиерот Христијан Мицкоски веќе телефонски му ја честитал победата и најавил иницирање дијалог со Софија. Од Владата велат дека очекуваат подобри односи, економска соработка и конечно деблокада на патот кон ЕУ.
Во последните пет години, Бугарија помина низ сериозна политичка криза, обележана со дури осум парламентарни избори.Наместо стабилност,секој изборен циклус носеше сличен исход – без јасен победник и без можност за формирање долгорочна влада. Очекувањата на Радев се дека конечно со неговата победа ќе се стави крај на досегашната нестабилна бугарска Влада.
