Градоначалникот на Општина Кочани, Владко Грозданов и претседателката на Здружението „Дијалог“, Јасмина Бошевска, денеска потпишаа меморандум за соработка за проектот „Вештини – клучот на зелената економија“, што го поддржува Амбасадата на Словенија и Министерството за надворешни и европски работи на Словенија.
-Во фокусот на проектот се обуки за развој на вештините кај младите за економско и социолошко зајакнување, развој на претприемачките капацитети преку поврзување со природното, традиционалното и културно наследство и во насока на развојот на зелената економија, наведено е во соопштението од Општината.
Реализацијата на проектот во Кочани ќе биде насочена кон вклучување на млади невработени луѓе и на настрадани во трагедијата во „Пулс“. Учесниците ќе се обучуваат за стекнување вештини поврзани со билки и шумски плодови, дизајн на домашни градини и за едукација за капацитетите на природата.
