Уште една потврда од меѓународните институции дека Бугарија ги крши правата на Македонците на слободно здружување со тоа што одбива регистрација на здружение. Комитетот за човековите на Обединетите нации заклучи дека судските одлуки биле нејасни и претерано формалистички, потенцирајќи дека тамошните власти не ги зеле предвид информации на Македонците за формирање на непрофитната организација за заштита на човековите права, ниту објасниле кои одредби од Законот биле прекршени. Затоа, Комитетот носи заклучок дека државата односно Бугарија не го оправдала одбивањето за регистрација на организацијата ниту покажа дека одбивањето било неопходно и пропорционално и има рок од шест месеци да ја исправи ситуацијата.
- “Постоењето на здруженија кои мирно промовираат идеи за толеранција и коегзистенција на различни етнички групи мора да се заштити, дури и ако нивните ставови не се споделуваат од властите или од мнозинството на населението. Овој израз на плурализам, разновидност и толеранција го води тековното работење на Комитетот во врска со неговиот нацрт-Општ коментар бр. 38 за правото на слобода на здружување” рече Ивон Дондерс, членка на Комитетот.
Но ниту ова одлука нема да има суштинско влијание врз официјална софија без посилен меѓународен притисок, смета премиерот Христијан Мицкоски. Според него, Македонија во изминатиот период добива сè повеќе меѓународна потврда за своите позиции, но оти тоа не значи автоматска промена на ставовите на Бугарија. Според него, без јасен и координиран став од Европската унија, не може да се очекува промена во односите, иако ваквите одлуки, како што рече, ја зајакнуваат позицијата на земјава на меѓународната сцена.
- „Јас не очекувам дека ќе има ефект врз политиката кај нашиот источен сосед, освен ако не се вклучи силна, робусна акција од Брисел“, изјави Мицкоски.
Премиерот критикува дека одредени политики на „меко ткиво“, кои во минатото ги воделе СДСМ, придонеле за, како што рече, отстапки во однос на македонскиот идентитет.
- „Секој што верува дека со промена на Уставот или со отстапки ќе се решат проблемите – се лаже. Тоа е или неразбирање на политиката или свесно оттурнување на националните интереси“, истакна Мицкоски.
За одлуката на Комитетот на ОН, информираа од ОМО „Илинден“ – Пирин, од каде наведуваат дека станува збор за значајна одлука во контекст на правото на здружување на Македонците во Бугарија и заштитата на човековите права. Нивниот негативен одговор за регистрирање на “Правозаштитен комитет Толерантност“ освен првостепениот суд, ја потврдила и Апелација.
