Добра вест за потенцијалите на македонската економија од реномираните агенции за кредитен рејтинг. „Стандард и Пурс“ и „Фич“ во своите полугодишни прегледи го потврдија стабилниот кредитен профил на земјата, што во услови на глобални предизвици е значаен сигнал за стабилноста на макроекономските политики, умереното ниво на јавниот долг и способноста на државата редовно и навремено да ги сервисира своите финансиски обврски. „Стандард и Пурс“ го задржа кредитниот рејтинг на државата на нивото „BB-“ со стабилни изгледи, додека „Фич“ го потврди кредитниот рејтинг на „BB+“ со стабилен изглед.
Станува збор за стандардна процедура согласно европската регулатива, при што се врши оценка на тековните економски и фискални показатели, како и на пазарните движења. Она што е важно е дека во рамки на овој полугодишен преглед не е објавено ново истражувачко ажурирање, што укажува дека клучните фактори кои влијаат врз кредитниот рејтинг на државата остануваат непроменети.
Потврдените кредитни рејтинзи за министерката за финансии Гордана Димитриеска–Кочоска претставува значаен сигнал за доверба во економските политики и охрабрување за продолжување на реформите, со цел обезбедување одржлив економски раст и подобар животен стандард за граѓаните.
Според „Стандард и Пурс“ и „Фич“ економскиот раст на државава е поддржан од засилените јавни инвестиции, особено во инфраструктурни проекти, како и од растот на потрошувачката на населението.
