Генералната секретарка на Собранието, Марина Димовска, оствари средба со амбасадорот на Швајцарската Конфедерација, Кристоф Зомер, на која во фокусот беа досегашната соработка, рефлексии на активности и планови и приоритети на Собранието за реформи.
Димовска, како што соопшти собраниската прес-служба, се осврна на плановите и приоритетите на Собранието за реформи што се спроведуваат преку собраниската служба, со акцент на донесената стратегија за дигитализација на Собранието 2026 – 2028, усвоениот акциски план за унапредување на рамноправноста меѓу жените и мажите 2025 – 2027, етичкиот кодекс за службата, е-регистарот, преку кој граѓанските организации се пријавуваат со свои податоци и сфери на интерес овозможувајќи им на работните тела директно да ги поканат на своите седници.
– Во согласност со функционалната анализа, преку која се согледаа клучните предизвици од организациски и функционален аспект во секојдневното работење на Собранието, се формираа нови одделенија за процена на влијание на регулативата и за стратешко планирање за навремено подготвување на стратешкиот план на Собранието, планирање на стратешките приоритети и нивна фискална процена – истакна Димовска.
Генералната секретарка ги нагласи и успешното работење и достигнувањата на службата во Парламентарниот институт, Собранискиот ТВ-канал, како и обуките за јакнење на капацитетите на Службата и академско надградување, поддржано од Швајцарската Конфедерација преку НДИ.
Амбасадорот Зомер изрази задоволство од досегашната соработка и упати честитки за почнатите процеси нагласувајќи дека тие ќе бидат дополнително унапредени преку заеднички заложби. Тој ја нагласи значајната улога на собраниската служба во обезбедувањето натпартиски консензус, особено за законските решенија важни за евроинтегративниот процес на државата.
