Градоначалникот на Град Скопје Орце Ѓорѓиевски вечерва на покана на поглаварот на Исламската верска заедница, Реис ул-Улема, присуствувал на традиционалната ифтарска вечера.
– Таму каде што почитта нè обединува! Вечерва, на покана на поглаварот на Исламската верска заедница, Реис ул-Улема, присуствував на традиционалната ифтарска вечера со нашите браќа и сестри од исламска вероисповед. Во духот на меѓусебната почит, разбирање и искрена човечка блискост, вечерта помина во пријатна и топла атмосфера, испраќајќи силна порака за соживот, толеранција и заедништво. Токму ваквите моменти нè потсетуваат дека различностите се наше богатство, а почитта, наш заеднички темел, напиша Ѓорѓиевски на Фејсбук.
Рамазанските денови, потенцира тој, се денови на духовна сила, добрина, солидарност и обединување.
– Денови кога се отвораат срцата, кога се помага на ближниот и кога уште повеќе се зацврстуваат врските меѓу луѓето. Да продолжиме да се почитуваме, да се поддржуваме и да останеме сплотени, за заедно да ја оствариме нашата мисија – силно и модерно Скопје и просперитетна Македонија. На сите верници им посакувам лесен и благословен пост, пишува Ѓорѓиевски на својот фејсбук профил.
