Сред кризна состојба во која се најдоа околу 20.000 домаќинства во Струга и струшко поради енормното загадување на водата за пиење, градоначалникот конечно се врати од службено патување. Состојбата со водата, вели, не е добра, но се преземаат мерки за надминување на проблемот и лоцирање на вината.
„Се мисли дека е можно да е дојдено од земјотрес, може да е дојдено од лица кои работеле од 2020-та и пред тоа со копање во горниот дел на базенот, што е можно, но не можам да потврдам со сигурност дека се случува тоа. Овој феномен не дојде тек така, туку поради слабото менаџирање и неземање на мерки кои се потребни за ваква ситуација од бившите директори, од бившата власт и мислам дека сите чинители ќе одговараат“, вели Менди Ќира, градоначалник на Струга.
Една недела Струга е без притисок на вода, од чешмите тече кал, а граѓаните полнат канти и влечат флаширана вода. Ова го отвора прашањето зошто општината, по примерот на други помали градови, не обезбеди чиста вода за населението со цистерни, диспензери, канистри со чиста вода за жителите, а посебно за училиштата и болниците.
„Немаме такви услови, градот Струга нема такви услови, реално кажано. Градот Скопје има цистерни, има институции кои многу се спремни. Градот Струга, за жал, е ваков каков што е. Од Горна Белица ни помогна тоа што таму е чиста водата, го намаливме дотокот на вода од Шум за да имаме малку почиста вода“, вели Меџаит Јусуфоски, директорот на Ј.П. „Водовод“ – Струга.
„Па тоа секој град треба да има резервоари или цистерни каде што има здравствено исправна вода за пиење, од каде што луѓето ќе црпат вода. Затоа што на оваа немаштија цел месец луѓето мораат да купуваат вода и за пиење и за миење. Како ќе готват градинките, оваа вода не е ни за приготвување на храна, ни по градинки, ни по болници“, вели Лидија Симоноска, Центар за јавно здравје Охрид.
Резултатите од анализите се застрашувачки, матноста на водата во Заводот за нефрологија и Општата болница била 23 пати над дозволената граница. И во една ваква ситуација, од јавното водоводно претпријатие, за да ја намалат матноста, исклучиле дел од пумпите кои црпат вода од Шум, за сметка на беличките извори кои немаат доволен капацитет за сите домаќинства. Во вторник извесно е дека има вонредна седница на Совет на која ќе се расправа за овој горлив проблем.
