Кандидатурите за наследник на Љупчо Коцевски патуваат кон Советот на јавни обвинители. Првиот човек на Советот вели дека штом стигнат веднаш ќе закаже седница и во законскиот рок од 15 дена ќе ги оценат тројцата обвинители и двајцата судии кои се кандидираат за прв човек на Обвинителството. Секој кандидат може да добие позитивно или негативно мислење. Владата може да го предложи кандидатот за кој зелено светло ќе дадат членовите на Советот на јавни обвинители. Финално, предлогот од Илинденска оди во Собрание, а за избор за државен обвинител е потребно да гласаат 61 пратеник.
- „До овој момент сѐ уште не стигнале пријавите на кандидатите. Кога ќе стигнат, во законски рок од 15 дена, ќе дадеме одговор за кандидатите. Во принцип ги знаеме сите кандидати, но ќе ги разгледаме пријавите и на седница ќе одлучиме. По разгледувањето на документацијата, Советот ќе ја извести Владата во законскиот рок“ рече Башким Бесими.
За државен обвинител претендираат 5 кандидати. Сегашната в.д. државна јавна обвинителка Анита Тополова-Исајловска, обвинителката Ленче Ристовска, судијата од Кривичниот суд, Ненад Савевски, поранешниот претседател на Кривичниот суд, Владимир Панчeвски, и обинителката од скопското Обвинителство, Лидија Раичевиќ.
Влада од пред два дена донесе заклучок за петте кандидатури за државен јавен обвинител и сите ќе бидат пратени во советот.
Постапката следи по оставката на претходниот државен јавен обвинител Љупчо Коцевски поднесена во декември минатата година. Анита Тополова-Исајловска, е в.д., но таа функција може да биде најмногу до шест месеци.
Бесими ја одложи денешната седница на Советот на неодредено време поради немање кворум за работа.
За денешната седница беа предвидени повеќе точки, меѓу кои и записникот на Комисијата по постапката за обезбедување и гарантирање на самостојноста на јавните обвинители, поднесена од јавниот обвинител Ленче Ристовска.
- „Тој законски рок од 30 дена колегите го почитуваат. Претходно имаше празници неможевме да закажеме седница. Сега немаме кворум, но ќе ја закажам за многу брзо“ рече Басими.
Советот требаше да одлучува и по два дисциплински предмети, а требаше да донесат и одлуки за објавување огласи за избор на јавни обвинители во Основните јавни обвинителства во Ресен, Крива Паланка и Кочани.
