Конфискација на криминално стекнатиот имот е вистинскиот начин за справување со напливот на корупција, која е повеќе децениски горлив проблем во Македонија. Според познавачите тоа е рак рана за која кај претходните власти немаше волја за решавање. Сепак, потенцираат дека токму одземањето на украденото е начин да се намалат криминалните дејствија, особено во делот на високата корупција.
Поранешниот претседател на Антикорупциска Воислав Зафировски, за Алфа вели дека власта покажува сериозни сигнали дека има желба и подготвуваат големи чекори кон ефектуирање на законите со цел украдените пари да се вратат кај граѓаните.
-Вистинскиот чекор суштински вистински чекор кон намалување на корупцијата е конфискација на нелегално, нелегитимно стекнат имот. И мислам дека ова е правилен чекор кон ефикасна борба против корупцијата, особено корупцијата на високо ниво. Конфискацијата станува реална алатка во рацете на правосудните органи, изјави Зафировски.
Конфискацијата на имот, иако законски е пропишана и сега, во текот на минативе години многу ретко се користеше за поврат на незаконски стекнатите средства. Според Зафировски има повеќе причини за такво нешто, а меѓу главните е немањето на политичка волја кај претходните политички чинители во земјава.
-Многу малку е применет во праксата во секојдневието. Па дури и таму каде што ќе се примени конфискација на имот, беше многу тешко повратот на тие средства да се реализира, заради Х правни причини и заради многу нејаснотии, недоречености во самата легислатива, но и во отсуство на политичка волја, изјави Зафировски.
Премиерот Христијан Мицкоски кажа дека повеќе од 50 предмети за висока корупција, кои со години биле затскриени, сега се во постапка и дека ова е само почеток со цел- украденото да се врати кај народот, да се испрати јасна порака дека криминалот станува неисплатлив, како и дека нема повеќе недопирливи. Со цел поттик украденото да се врати на државата и луѓето формиран е Национален совет за финансиски истраги и конфискација за имот, со кој претседава вицепремиерот за добро владеење Арбен Фетаи.
Матеја Петровски
